٣٠‏/١١‏/٢٠٠٧

رسالة من فيلسوف يكره الكلاشينكوف


في الأول بس أحب أقولكم إني مسئول عن كل كلمة اتنشرت في الافتتاحية وبشكر كل واحد قالي رأيه بس أحب أقول إن اللي اتكتب بردو جزء من شخصيتي بجانب الجزء اللي بتقولوا عليه مرح وميش كئيب بس يا جماعة دي ماكنتش كئابة دي كانت رسالة لي ولكل واحد تسول له نفسه انه يحاول يحبطني أو يقلل من قدري أو يضع لعقلي أي حدود.

اشطه كده نرجع لمرجعونا ليه انا اخترت اسم البلوج يبقي كده أولا اللي اقترح اسم البلوج هو أخوي العزيز بعد أن غمرني "زي ما بيقولوا" بسيل من الاقتراحات للتسمية بس اشمعني ده أقولك يا سيدي أول حاجة الفيلسوف ميش معناه اني هاعيش عليكم الدور والحوارات دي لا الفلسفة بالنسبة لي هي أسلوبنا في الحياة و طريقة تفكيرنا , أقولك إزاي الفلسفة عند اليونانيين وهم أول من وضعوها في قالب علمي صريح معناها محب الحكمة وأنا لا أعتقد إن في شخص يرفض إنه يكون محب للحكمة ومع كده كلنا فلاسفة سواء عرفنا كده أو معرفناش لأنك لما بتتعرض لموقف ما و تشغل دماغك عشان تتطلعله حل يبقي أنت كده بقيت حكيم سواء طلعت حل أو لا بس في الأخر هتلاقي نفسك اتعلمت حاجة وبكده حكمتك زادت.

بعد كده لما تتعرض لموقف تاني أي موقف من مشاكل الشغل مرورا برمي المنديل في الشارع ولا في صندوق الزبالة ولا تنتهي بالموقف الوطني هتحاول انك تتصرف وتتخذ قرار نابع منك ومن شخصيتك بيمثل حكمتك في الحياة, بتفكرك بحاجة كلمة حكمة دي أيوه صح بالفلسفة, أظن لو أنت مقتنع بالكلام اللي أنا قولته ده هتلاقي رد حكيم ترد بيه علي اللي بيقولوا "يا عم أنت هتتفلسف".

تاني حاجة ليه الكلاشينكوف؟! لأنه أصبح أكتر من بندقية بقي عامل زي الفلسفة بردو أسلوب حياة يعني مثلا لما تركب ميني باص من بتوع الجامعة بولاق لواء وتلاقي التباع اللي واقف علي الباب عمال يزغط في العربية و لا البطة البلدي و لازم كل واحد قاعد يشيلوه اتنين علي حجره ولو فتحت بوقك بكلمة "حرام" و "لامفيش مكان" تلاقي التباع راح مطلع كلاشينكوف من بوقه ومسك كلاشينكوف في إيديه وطبعا ده كله أثناء تسديده لكلاشينكوف آخر برجله ، وبالمثل بتلاقي الشخص التاني متحفز من الأول و شايل ربطة كلاشينكوف في جيب الجاكته الشمال ، ده مثل بسيط علي الإستخدام اليومي للكلاشينكوف في حياتنا العادية و انتوا طبعا تقدروا تقيسوا علي بقية المواقف.

بس يا جماعة هو ده كل الحوار وربنا يجعل كلامنا خفيف علي قلوبكم أو علي الأقل قلبي أنا.

هناك ٧ تعليقات:

marwa salah يقول...

هنيئاً لك يا فيلسوف كلاشينكوفك

بس الله يكرمك عاوزين نشوف حكم الفيلشسوف وكلاشينكوفاته كتير ع البلوج مش كل 9 شهور مرة قربت تغلب الارض اللى بتلف حولين الشمس كل سنة .. مش عارفة ايه اخبار المعلومة لأنى فاكراها من 5 ابتدائى

يلا متطولش غيابك .. كتاباتك تحفة

سلامز

غير معرف يقول...
أزال أحد مشرفي المدونة هذا التعليق.
Cipher يقول...

ممممم تدوينة انما تدل على مدوان واعد
لاحظت انك قسمت الجملة نصفين ثم مضيت في التحليل الجزئي -الفيلسوف -الكلاشينكوف , انتا تمكنت من إقناعي بالشق الأول(الفلسفة) لكن بالنسبة للثاني الا ترى انه مبالغ فيه بعض الشئ يعني مثلاً كان بإمكانك ان تستعين برجل السلاح الأول أحمد القطب عن طريق اتصال هاتفي مباشر معه او حتى اضعف الإيمان ان تدخل على المدونة الخاصة به التي تحتوي على مكتبة كاملة للأسلحة العسكرية الديجيتال منها و الأنالوج... تسوق الآن...

أحمد القطب - http://warfarearabic.blogspot.com

محمد المعتصم -
http://www.cipher25.blogspot.com

أحمد القطب يقول...

على فكرة يابو ياسر، مدونتك شيك شيك بطريقة فظيعة.. مين مهندز الديكور اللي اختارلك التمبليت ؟

بجد والله مش هزار.. ذوقك حلو..
...............

ملاحظة:
الواد اللي كاتب فوقيا ده مجنون.. مجنووووووووووووووون

أحمد القطب يقول...

على فكرة فيه حاجة كمان نسيت اقولها.. المدونة دي قيمة فعلا.. لأني حاسس انها أضافتلي لما قريتها.. رغم انها مكتوبة بلغة عامية جعضانة شوية ;)

Coca يقول...

بصراحه التدوينه عجبتني واسلوبك عجبني جدا جدا

بس مش تتاخر في بوستات حلوه كده

اما بالنسبه لثقافه الكلاشينكوف فكلامك منطقي جدا وتشبيهك رائع لابعد درجه
تحياتي وفي انتظار الجديد

Islam Salah يقول...

حلوة لا بجد حلوة طلعت بتفهم ياد يا ياسر بس دة ميمنعش وجهة نظري فيك
انك.......... انت عارفها كويس

يلا شد يامان
تحياتي